النووووووووووووووووم

من طرف **Dr.7MDYTOV** الخميس مارس 26, 2009 9:07 am

كلمة من تلات حروف. سهلة صح؟ واحلى حاجة ف الدنيا (بعد البسبوسة طبعا) تيجي تفهم بقى ايه اللي بيحصل تقعد 3 أيام
قولوا "سبحان الله"

كل واحد مننا عنده حاجة اسمها " الساعة البيولوجية" وديه موجودة في حتة ف المج اسمها تحت المهاد "Hypothalamus" تعمل ايه بقى؟

تبعت اشارات بالليل علشان تفهم الجسم ان احنا بالليل واول ما نصحى تبعت اشارات تانية علشان الجسم يفهم ان احنا الصبح. سهلة؟

وعلشان كده لما يقرب وقت النوم بتاع سعادتك (بفتح التاء للمذكر وكسرها للمؤنث) يبدأ تحت المهاد يبعت اشارات لحتة كده جمبها اسمها الغدة الصنوبرية "Pineal body"

الغدة الصنوبرية "Pineal body" تقوم تفرز هرمون النوم اللي اسمه ميلاتونين "Melatonin" علشان جسم سعادتك (هرشتوا حوار الكسر والفتح بقى) يستعد للنوم وأول ما ترقد
ع السرير يحدث الآتي :

أولا : تقل ضربات القلب ( وديه بيعملها تلات اربع حاجات كده. ماتشغلوش بالكم بيها)

ثانيا : يقل معدل التنفس

ثالثا : يقل الكورتيزول والثيروكسين علشان يخلي بقيت الاجهزة تنام

رابعا : المخ يخف الاشارات اللي بيبعتها للعضلات علشان تقلل الشغل وسعادتك(خلاص هرشتوا الحوار) تنام(ي)

فيا ريت بعد كده تناموا مرة واحدة ف اليوم علشان ما تقرفوش الجسم معاكوا فيطلع عليكم القرف ده لما تيجوا تصحوا -لا مؤاخذة-

وبهذا أعزائي الأعضاء نكون قد انتقلنا من منتدى "طب ع الماشي" لمنتدى "طب المصاطب"